Heile Borgund frå Sjurhaugen og austover har hatt ingen eller svært avgrensa mobil- og internettdekning deler av tysdag, onsdag og torsdag. No melder tele- og nettleverandøren at dei reknar med å få ordna dekningsbrotet mellom klokka 17 og 18 torsdag 6.mars.
Alternative kommunikasjonskanalar
Åtte basestasjonar har vore slegne ut, og fram til torsdag ettermiddag var det uklart kva feilen som tok mobil- og internettdekninga skuldast. Når feilen no er funnen reknar Telenor det som temmeleg sikkert at dekninga vil vera attende i løpet av nokre timar.
Lærdal kommune har i samarbeid med Lærdal Røde Kors hatt eit opplegg med alternative informasjonskanalar under dekningsbrotet.
Følgjande gjeld for kommunikasjon frå Borgund så lenge mobil- og internettdekninga er nede:
- Borgund Oppvekst har mobil- og internettdekning ettersom dei er tilknytt Sognenett - dersom nokon har viktig informasjon som må formidlast raskt kan ein møta opp og ta kontakt med rektor Linda Maristuen.
- Borgund Oppvekst og Nærbutikken Borgund (Ope frå kl. 10 til 17) har fått utdelt naudnett-radioar. Frå desse to plassane kan ein altså nå naudetatane raskt eller melda frå om kritiske hendingar.
- Dei som har sikringsradio heime kan kalla opp på kanal “sikring 8” (denne når ut på stort sett heile Borgund) ved prekært behov. Det er oppretta basar som har kanal “sikring 8” ståande på og som kan formidla vidare på naudnettet til naudetatar og legevaktsentral. Dette alternativet skal berre nyttast ved naudsituasjon eller kritiske hendingar.
- Elles fungerer mobilnett/mobildata vest for Seltatunnelen. På austsida skal det vera dekning aust for Borlaugstunnelen og det er meldt om tidvis dekning kring Borlaug. Mot Hemsedalsfjellet er det lenger til fungerande dekning. Klikk på denne lenkja til dekningskart og vel fana “nettverkstatus” for å sjå oppdatert informasjon om dekninga.
Ettersom dei færraste på Borgund no kjem inn på internett og nettsider må ein gjerne spreia denne informasjonen gjennom familie og kjende. Lærdal kommune spreier også denne informasjonen på fleire vis. Vidare har heimetenesta ei ekstra oppfølging på Borgund i samband med utfallet av dekninga.
Vatnet har gått ned på Bergo
Natt til onsdag kom det sopass mykje vatn på Bergo at dreneringssystemet ikkje klarte å ta unna alt. Lærdal kommune har jobba med å auka dreneringa gjennom dagen onsdag - det kom vatn inn i eit par bygg, og her vart det jobba for fullt med å avgrensa skadane. Torsdag morgon har vatnet gått nedatt og situasjonen er under kontroll.
