Dei siste åra har Lærdal kommune, næringsaktørar og organisasjonslivet arrangert Lyse dagar i Lærdal i slutten av april. Då feirar me at sola er attende og våren for alvor komen til den djupe, vakre dalen vår.

I år blir det nesten ei veke med arrangement frå tysdag 22. april til søndag 27. april - det blir eit spennande og svært variert program! No frå midten av mars att slepper me eitt og eitt av arrangementa som går av stabelen, så kjem også fullstendig program når alt er klart.

Her kjem eit arrangement som blir starten på eit viktig arbeid:

Onsdag 23. april kl. 18

Frivilligkveld med gratis pizzabuffet og Arve Uglum i kultursalen

Me har eit fantastisk lags- og organisasjonsliv i Lærdal, og me er veldig gode på arrangement drifta på dugnad. Tenk på kor viktig dette er for bygdi – det hadde vore skralt med fritidsaktivitetar om det ikkje var for den jobben jobben alt av lag, organisasjonar og foreiningar gjer. Då kan me heller ikkje ta for gitt at dette går av seg sjølv utan vidare.

Lærdal kommune har fått tilskot frå Vestland fylkeskommune til å utforma ein frivilligpolitikk. Det handlar om å finna ut kva som skal til og kva kommunen kan gjera for at organisasjonslivet står sterkt også i framtida. Arbeidet startar med Frivilligkveld i kultursalen onsdag 23. april.

Sogn Avis-redaktør Arve Uglum er i vinden for tida – han har til og med fått ei byste av seg sjølv i Fjøra. Uglum kjem på Frivilligkvelden.

Program:

  • Velkomen ved Trine Grøttebø, kommunalsjef samfunn, kultur og næring i Lærdal kommune
  • Ikkje ver ein keisam plass ved Sogn Avis-redaktør Arve Uglum
  • Panelsamtale mellom engasjerte frivillige frå Borgund, Ljøsne og Lærdalsøyri
  • Kva er greia med å laga ein frivilligpolitikk? ved Ole Ramshus Sælthun, rådgjevar kultur og kommunikasjon i Lærdal kommune
  • Gratis pizzabuffet på Laksen bakeri og kafé
  • Gruppediskusjonar - Kva skal til og kva kommunen kan gjera for at organisasjonslivet står sterkt også i framtida?

Alle er velkomne og det er gratis inngang, men ein må melda seg på i framkant  - klikk på denne lenkja for å booka gratisbillett.