Dei siste åra har Lærdal kommune, næringsaktørar og organisasjonslivet arrangert Lyse dagar i Lærdal i slutten av april. Då feirar me at sola er attende og våren for alvor komen til den djupe, vakre dalen vår.
I år blir det nesten ei veke med arrangement frå tysdag 22. april til søndag 27. april - det blir eit spennande og svært variert program! No frå midten av mars att slepper me eitt og eitt av arrangementa som går av stabelen, så kjem også fullstendig program når alt er klart.
Først ut er ein godbit på teaterfronten:
Torsdag 24. april kl. 19
Teaterframsyning: Vestlandet – i kultursalen
Forfattaren Erlend og bildekunstnaren og idesprutaren Yngve køyrer vestlandet rundt i ein nikotingul Toyota Camry. Dei trassar uvêr, ras og stengde tunnelar på ein fuktig tripp gjennom Vestlandets dramatiske natur.
Som leiemotiv har dei Anders Lysne, bondeopprøraren og vegbyggaren frå Lærdal, som vart halshogd i Bergen i 1803. Dei har eigenhendig stole skallen hans, og no vil dei bringa han heim. På vegen møter dei både levande og døde, spelemenn, separatistar og tobakksbønder, og blir forfølgd av skumle embetsmenn frå Austlandet.
Det er ikkje fritt for at det doggar på brillene i denne nærsynte hyllinga av – og harselasen med – det vestlandske sinnelaget. Draum og røyndom glir over i kvarandre i ein hysterisk heisatur gjennom språk og landskap.
Både lesarar og kritikarar var vilt begeistra då «Vestlandet» av Erlend O. Nødtvedt kom i 2017, og boka har fått kultstatus.
Billettar finn du ved å klikka på denne lenkja, og meir informasjon om stykket finn du på Friskus på denne lenkja.
