Situasjonen er uoversiktleg og utviklar seg svært raskt. Me fventar at fleire vegar kan bli stengt av skred eller flaum på kort varsel, skriv Statens Vegvesen i ei pressemelding onsdag kveld.

– Me ber alle om å vurdera om dei verkeleg må ut på vegen. Situasjonen er uavklart i heile Vestland. Terrenget er vassmetta, det regnar framleis og flaumtoppen i vassdraga er ikkje nådd. Det er mykje overvatn på vegane. Det er fare for alle typar skred. Me ber innstendig alle om å vurdera om dei må ut på vegen i kveld og i natt, seier Svenn Finden.

Politiet og Statens vegvesen oppmodar alle om å avgrensa trafikken på vegane til eit minimum. 

– Det er svært sjeldan at me går ut med denne typen bodskap, men no finn me det riktig, seier Finden.

Sjå oversikt over stengde og kolonnekøyrde vegar i Rogaland, Vestland, Møre og Romsdal og Trøndelag (lenka blir oppdatert automatisk).

Vegar som er eller blir stengt på grunn av skred blir ikkje bli opna att før torsdag.

Viss du må ut på vegen: Orienter deg, berekn god tid og køyr etter forholda

– Trafikantar som må ut på vegane i dei aktuelle områda bør sørgja for å vera godt førebudde. Sjekk vær- og føremeldingar, og hald deg oppdatert undervegs, oppmodar Finden.

– Det beste tipset eg har er å lasta ned appen Vegvesen trafikk, og aktivera varsel for området du ferdast i.  Då er du alltid oppdatert på dei viktigaste trafikkmeldingane som er relevante for deg, seier han.

Finden ber også trafikantar ta ekstra forholdsreglar, med tanke på at både vegar, bruer og fjellovergangar kan bli stengde på kort varsel:

– Syt for at bilen har full tank eller fullt batteri, og ta med ekstra drikke, mat og varme klede. Då er du betre rusta viss du blir ståande i kø, seier han.

Her finn du oppdatert informasjon: