Varsel om oppstart av planarbeid. Rv 5 kryss Sjukehusvegen - Nedre Eri

Statens vegvesen skal i samarbeid med Lærdal kommune i gang med å laga detaljreguleringsplan for dette prosjektet.

Varsel om oppstart av planarbeid. Rv 5 kryss Sjukehusvegen - nedre Eri.

Me ber med dette om innspel til arbeidet, med frist 13.09.2024.

Skildring av prosjektet

Målet med prosjektet er å betra trafikktryggleiken og framkoma på strekninga. Prosjektet planlegg for å utbetra krysset til Lærdal sjukehus og utvida eksisterande veg sørover til Nedre Eri for å etablera forsterka midtoppmerking på strekninga. Forsterka midtoppmerking har synt seg å vera eit effektivt og rimeleg tiltak mot møteulykker.

Eksisterande vegbreidd varierer innanfor planområdet og er om lag 6,5 meter. Prosjektet planlegg for ei ny vegbreidd på 8,5 meter, i tillegg kjem rekkverksrom og grøfter.

Prosjektet skal planlegga for etablering av venstresvingefelt for avkøyringa til Sjukehusvegen, samt utbetring av kollektivhaldeplassane i området. Tiltaket vil medføra naudsynt langsgåande utviding av eksisterande veg med om lag 2 meter mot vest (fjellsida) over om lag 2 km. Avkøyringstilhøva i området vil også bli vurderte.

Kartet viser planområdet - den svarte, tjukke streken er plangrensa

For å kunne gjennomføra prosjektet skal det også sikrast område for rigg og areal for mellomlagring av massar i anleggsperioden.

Det er vurdert til at reguleringsplanarbeidet ikkje utløyser krav om konsekvensutgreiing i høve «Forskrift om konsekvensutredninger». Notatet med KU-vurdering ligg tilgjengeleg på Statens vegvesen sine heimesider.

Dette prosjektet har ei eiga nettside hjå Statens Vegvesen som du kan sjå ved å klikka på denne lenkja.

Planområdet

Planområdet startar i utkanten av Lærdal sentrum og strekker seg vidare sørover riksveg 5 til Nedre Eri der prosjektet overlappar tidlegare breiddeutvidingsprosjekt, rv 5 nedre Eri - Håbakken. Planområdet er om lag 195 daa stort og omfattar eksisterande veg, fjellside, jordbruksareal og elvekant langs Lærdalselvi. Det er ikkje planlagt for tiltak langs elvekant eller ut i elva utanom nedføring av stikkrenner. Ved krysset mot Sjukehusvegen overlappar plangrensa eksisterande reguleringsplan Hanseskogen. Kartskisse som syner planområdet er vedlagt.