Me blir stadig fleire lærdøler – slik heng det saman

Etter ein litt «trå» start med nedgang på ni personar busette i Lærdal i løpet av første kvartal 2023 har det gått jamt oppover – i andre kvartal auka folketalet i Lærdal med 16 og i tredje kvartal med ytterlegare sju.

- Me er sjølvsagt glade for ei positiv utvikling, seier lærdalsordførar Audun Mo. 

Dei overordna tala er ein ting – årsakene til folketalsutviklinga er noko anna. Her er det tre parameter – fødde i høve til døde, innvandring og utvandring og innalandsk innflytting og utflytting.

Gode fødselstal

Når det gjeld det første – altså fødselsoverskot – plar det vera negativt med god margin. Dei ti siste åra har fødselsunderskotet vore 8,4 i snitt i Lærdal, altså at det er vel åtte fleire som har døydd enn vorte fødde i snitt årleg denne perioden. 

Dette har med samansetnaden i befolkninga å gjera – Lærdal, som dei fleste små kommunar, har ein relativt høg snittalder. Fram til og med tredje kvartal i 2023 er det «berre» fødselsunderskot på éin, som då er bra i høve utviklinga dei siste åra. Ikkje minst er det gledeleg at det er 16 fødde på desse tre kvartala, og ein kan dermed bikka 20 fødde i kommunen i løpet av 2023. Det har ein berre gjort ei gong før i løpet av den siste tiårsperioden – i 2014 (21 fødde).

Her ligg veksten

Når det gjeld innvandring kontra utvandring så er det éin i pluss her. 13 personar har kome til Lærdal frå andre land, 12 har flytta frå Lærdal til andre land.

Dermed er det på innanlands tilflytting at folketalsveksten ligg – det har flytta 70 personar til Lærdal kommune frå andre norske kommunar i løpet av dei tre første kvartala av 2023 medan 56 har flytta frå Lærdal til andre plassar i Noreg. Det gjev ei netto tilflytting på 14, og snittet den siste tiårsperioden har vore pluss 4. Ein skal vera forsiktig med å spekulera i årsakene, men det kan tyda på god trivselsfaktor.

- I så fall er det sjølvsagt svært gledeleg, seier ordførar Mo.

Heile statistikken

Det aukande talet på flyktningar til Noreg og Lærdal spelar sjølvsagt inn, men det er vanskeleg å seia kvar og korleis det påverkar statistikken etter tredje kvartal: 

Lærdal har vedteke å busetja inntil 40 flyktningar i 2023 – for øvrig mest i Indre Sogn i høve folketalet – og flyktningane kan hamna både i innvandrings- og tilflyttingskategorien i statistikken. Det kjem an på om og eventuelt kor lenge flyktningar har vore i flyktningmottak andre stader i Noreg i mellomtida. Flyktningar som flyttar frå Lærdal kan også hamna i både utvandrings- og utflyttingskategorien dersom dei reiser frå kommunen, avhengig av kvar dei reiser. Dessutan kan det vera noko tregleik i registreringa av kva kommunar flyktningar blir busette i.

Her er heile statistikken for 2023: